انت الوحيد ------ انت الوحيد اللى ماحدش يعرف بتحب ايه ركبت قطر الغربه الابديه ورحلت عن الدنيا من غير ماتكتب وصيتك وتقول فيها اتمشو شويه مع المغرب وسط الجناين والزرع وودعو الشمس ف قلب المغيب لجلن يطيب قلبى وانا فى التربه ماكتبتهاش ولا قلت فيها اتوزعو على الندوات ف عز عز الشتا وارجعو ماشين على الاقدام ولا تاكلوش لحمه وكفته وكباب ماكتبتش ليه فى وصيتك عن كل شىء بتحبه وبيستعطفك وبيستجديك مين هايترحم عليك مين اللى فاضى يناديك دلوقت بس قعدت تفكر فى القبر ان الدنيا حلوه من غير مرض لعين اسمه الفقر من غير نساوين جميله ونساوين وحشه من عير عناد وموت حظ من غير هروب فى اللاشىء واللاستقرار واللاحيره ولا زحمه ولا وجود من اصله
احتمال ------ احتمال اكون بانصهر مابين التمرد على البيئه وبين عقول الفلاحين الصبح بيشدنى من البشر ويسيب فى ننى عيونهم عيونى الخضره وشكلى الوسيم اهرب من عيون البنات اتدارى فى طلب اولادى للسندوتشات واباغت الدوشه ف دماغى اركب فرس السكات ساعات لما بشوفنى سرحان فى مشهد درامى لواحد شحاته وشايله عيل عنيه مش باينه من الجفاف ولابس جلابيه كستور مش باين لون خطوطها من الوسخ او تسرقنى البنت الهبله وتستعطفنى فافصل فى عنيها مشاهد دراميه واقعد ابكى تكتب فى نظراتها على صفحات المدى مسكينه وعارفه انك دايما بتعطف على انت الوحيد اللى ليه اتفاجا على صوتها وهيه بتسبلى الدين اصحى من النوم الروتين واسهر مع المترحلين من السنين ف السفر دايخين لا هما واصلين ولا واقفين ولا راجعين فيه شبه مابين الناس اللى راقده على الافران بينهجوا من البرد والمرض الحاجه الجوع الكسل الجهل الاحباط العوزه الفقر فيه شبه مابينهم وبين السنين
ولا حتى وانت اسفلت --------------------- يمكن عشان الحضره مش منصوبه او يمكن كيمان القش محتاجه لولعه او ما نزلش لسه اكبر راس فى الطريقه بتاجه المدهب والمرصع بالسيوف من سما الاحباب والصحاب او يمكن عشان البنت اللى عطتك كل ماعندها وفجاه صدتك حسيت بكبت كبت اكبر من امريكا
واكبر من هرم خوفو واكبر من الالهه فارتحلت ونهضت قمت وقعت فى اكوام السنين الغابره وحضرت شنطة سفرك لاى مكان ممكن تكون مش عارف تحدد ملمح انت نفسك فى ايه محتاج لايه المهم انك عندك رغبه فى الترحال وليه بالظبط وقفت فى نص البحر اليوسفى ودست برجليك على جسد الكوبرى
الكوبرى المتقنطر على شطوط قريتين كانوا بعاد عن بعض وحب الكوبرى الحديد يربطهم ببعض ومش مهم الناس تدوس عليه الكوبرى اللى بيربط بين بنى عامر وبنى خالد يشبهك تماما بتعدى عليه عربيات ربع نقل شايله حمير ومواشى وجرجير- وفجل وحريم وبنات – شنابات وعكازات – وعجل وموتسيكلات – وكارتات وجاموس وبقر ومكن وغنم وعيال حفيانه وعيال هربانه وعيال مرضانا وعيال جوعانا وعيال لصه وبنات لسه ماحددتش ملمح بنات بتحلم بالعدل وشيوخ عواجيز قاعدين يفكروا فى اللى راح ومالهمش دعوه باللى جاى ومن تحت الكوبرى تعدى الميه وجثث العيال الغرقانه بفعل فاعل والغرقانه طفش والغرقانه هروب الغرقانه والحقق الفاضيه وكل متخلفات القرى طب ليه بالظبط افتكرت وقفتك ع الكوبرى فى نص الليل ونسيت البنات الانجليز فى حمامات السباحه وهما بيحضنوا الشباب وبيمارسوا الرزيله قدام عيون المطرودين م الكون والمتعه ومحرم عليهم حتى التنفس والشهيق والزفير ليه نسيت كل ده وافتكرت قبور الفراعنه وجسر السويس فى الليل اشمعنى دلوقتى عرفت انك تشبه للكوبرى المتقنطر رغما عن انفه ومتحمل كل الخلق وانت كنت عامل زى قطر الصعيد الصعيد والسبنسه ايام الميرى وبياعين الشاى والترمس والبليله والامشاط والولاعات والنصابين والحرميه والجزمتيه والبلاليص والزلع اكيد انت مش بتشبه لا للكوبرى ولا لقطر الصعيد انت بتشبه لشىء مش قديم ولا جديد شىء مافهش سما ولا قمر ولانجوم ولا حوريات وعصافير وشجر ونخل وبلح احمر وبلح اصفر وترعه صغيره بتمر من جنب قصر كبير فيه جنينه وقدامه خدم وحشم وبنات شربات وحنين وسندس وزبرجد ونرجسيات لا انت ما تشبهش حتى لفؤاد حداد وجاهين ويسرى حسان ولا لك عنوان انت مهمل اكيد زى عود الملوخيه اللى داس عليه الاتوبيس فى قصيدة مش عارف تعمل وشك كيف كان نفسك تبقى كومسرى اتوبيس مزحوم على طول او بياع شاى قدام مجمع التحرير والناس ملمومه حواليك وتلف عمه وتلبس جلابيه صعيدى وتقعد على كورسى خشب وتدلدل رجليك والدنيا ما تسيعك او كان نفسك تبقى صعلوك مش كوبرى ولا قطر او حتى زير نشفان تحت شجره دبلانه فى منشية الجبل لصفر او او انت ليه نسيت عشان تفتكر وما حددتش مناهجك فى فهاريس اغترابك وكل شىء متنطور فيك المخيخ والجمجمه المولعه وما بتؤمنشى ليه بالسحر والمطاريد الهربانين فى غيطان طوالى المطاريد اللى شاربين الترع وواكلين الدره ومحمصين قلوب الخلق فى التوهه ولا نفسكشى تبقى درويش واقف تسقف فى وسط الحضره وتساوى المريدين وتلم حواليك المجازيب يااااااااه ياسلام ع المجازيب اجمعهم واعمل عليهم رئيس ونعمل حضره على هيئة مؤتمر او مؤتمر على هيئة اجتماع كبير ونصرح بالقرارات اللى احنا عاوزينها ومش هانكتب توصيات كل اللى هانقوله هايتنفز فى الحال هانطلع م الحضره المعموله فى اى مكان كان شرق او غرب او حتى تحت تحت الارض نكسر الاصنام والالهه والبوس ع اللايدين والانحنا ونقول اللى احنا عاوزينه يقوم واحد مجزوب ويقول نهد الصومعه ونكسر البلاليص فى الحال كل شىء يتكسر وندوس ع النمل ونموت الدود نموت القطط ام عيون خضره ونربط كل الحمير فى اعمدة النور ونسيب القمر يدور ايوه مش احنا زعما الكون لا فيه شىء هايهون علينا ولا هانبقى دكتاتوريين فى شىء نلبس الغفر براقع ونولع فى البلاطى الانجليزى ونسحب منهم البنادق اللى بتضرب لورا ونسلمهم شوم كل غفير شومه وكل عيل من العيال الحفيانين ( نبله ) وينشل على اللى هوه عايزه يوقع غربان ويموت حيتان ويسيب العصافير الوظاويظ تطير ونطارد المطاريد لا انا مش هاشبه لحد انا نفسى اشبه لنفسى لا للكوبرى ولا للقطر ولا لشيخ الحضره اللى بياكل الفحم والكلوح المجنهر ويضرب الدبوس فى بقه الشمال يطلعه من بقه اليمين من غير دم والناس كلهم واقفين مساطيل فى مولد اى شيخ فى الصعيد فى البحيره والخليفه راكب الجمل ومش باين من الهودج فى وسط الزحمه والناس نفسها تشيل الجمل بالخليفه وزمر تركى ومدافع وكهارب وبمب بيتفرقع على الاسفلت الاسفلت اللى ساح واتشق ايوه ممكن تكون انت تشبه فعلا للاسفلت والمطبات والحفر وكل الكون بيدوس عليك مش بشويش ماحدش بيفكر فيك لا وانت كوبرى ولا وانت قطر ولا وانت شيخ حضره وشايف ذنوب البشر قدام عنيك ولا حتى وانت اسفلت متشقق بيشربوا من دمك البنادمين ؟؟؟!!!
عمم عقالات
فى سوق الحد سوق لتنين نخاسين حاجات تنباع ومين بياع ومين ع السكه متربع خرايط ويل عرايس من كتاب الامس بتتجرد من العناوين كهارب قلبك المجروح تروح على فين علوم الحاضر الاتى على فراتى ودجلة دم اورادى حبال منصوبه مربوطه على الرقبه تبرطع عسكر السلاطين تدق فى قمحك الدبلان ومين نعسان ومين غلبان ومين ضايع عمم عقالات فى وسط رماد شيلان بتنكس الرايه ومين هايفسر الايه بنات بتضيع وكله صريع وطفله اتنعكشت خلسه قصور ولوالى مختلسه وسوق بيفض وطن بيجض ع الطرقات وكله اوعاد قميص الرحله متعلق على بلكونة الفتوحات ونزلت تشرب الامجاد ماهيش طالعه نخيل واشجار اهى والعه ووسط الزفه مؤتمرات مع قرارات وتصريحات بنملك احنا تنديدات وشجب ونطر وبمب يدب ع الاسفلت نموت ونفرقع الفراقيع فى جمر وسيع وصحرا الروح اهى عاصفه وام العركه اهى راجفه وابو النياشين بتلثم ويتعلسم وديك ابوعرف فى الاقفاص على الاوناش ويدخل فار يشد فيران يخشوا قبور جماعيه واسد بانيابه فى السرداب سك الباب وما تسكوش يدوروا يدورا ما يلاقوش وهايلاقوا ومسيلى على هولاكو ياخلق ياهو دالولاكوا ماكات القطه هاتخربش ولا فى اكوامنا يوم تنبش ماعدش اشناب وهز كتاف تعالى ياحلوه نتونس خلاص الدم هايعنس ولا نتلم فين السم ماعادشى يهم بقى بالزم انا استاهل صروح الخزى انا كان حقى ع المنبر اعلى الصوت واتمخطر ولا ع البال وكان يخطر لكن اخطر قصص اعمامى تتكدر ياخلق الطلق مش منكر نطاطى الراس ونتشكر مهيب الركنفى اركانه تعالوا نداوى اشجانه فيمكن ترجع النشخه سنين المرجع: لا عاد ينفع ولا بيضر ياريت قبل الدخيل ما ير يصطادنا فى بحر وبر نروح للضل خلف التل نتصعب ونضرب كف فوقه كف ولا عمره النشيد الناشع الساطع فى دمه يجف ولا عمره لدمانا يمل ولا حبله فى يوم ينحل اكيد بيضيق الخنقه وسند وهند مشتركه بايدين الخل اكيد الحلقه طايله الكل اكيد الحلقه طايله الكل دى حلقة فل
نفسه يفرط رجليه فرط رجليه ونام دلوقتى بس لابوليس ولا نيابه ولا حد هايقدر ياخدك تحرى ولا طوابير عيش وطعميه وباذنجان من كتر طموحاته ماحققش الحلم بالمستحيل والصعب انه ماكنش وصل لحد هنا لكنه ماصدق مالقى حته ينفرط فيها على الاخر وكان فاكر انه خلاص هنا فى بيت الوحده بيت الراحه ماكانش حطط فى دماغه امتى القبر
حايتشرشخ عليه واحايضطروا اولاده يلموه فى شوال مع ناس ماكنشى بيطيقهم فى الدنيا لكن فجاه هايصبح متكاوم معاهم ومركونين جنب كوم الطوب والتبن ومعجنة الطين انا فجاه دخلت القبر وفتحت كفن امى وبصيت فى وشها ماشفتش حاجه غير بس غطرشه ودوخه وتوهه واماكنش فاكر انه داير يدور على ركبيه فى ار حته فى الشوال الدبلان المليان عضم وكان لسه امبارح بس راكب عربيه ومصوع ع الاخر وبيدخن بشرهه وكا ن بيشكى من العمود الفقرى وما صدق مانام وفرط رجليه يادوب بس الدود استلمه وبعد ماخلص عليه يتكنس على جنب فى القبر وبعديها يتحط فى شوال سقطت ختة عضم منه دخلت فى بنايه القبر الجديد دلوختى بس محطوط يفكر وهوه فى شوال ايه مصيره بعد ما اولاده ما يخلصوا بناية القبر الجديد هل ......؟؟؟ هايفصلوهم عن بعض وهايحصل بالظبط ويفرط ضهره تانى زى ما كان بيحلم بيليوم ده قلق عموما هوه مش هايتحاش من الشوال ده لحد الاخر واللى ادهى من ذلك انهم جابوا شوال عضم تانى وحطوه فوقيه واصبح مافيش منفس كيف دلوقتى هايفكر وهوه مش عاطى بال لايها حاجه غير بس هوه كان نفسه يفرط رجليه كان منتظر بس فرصه
عم عليش -------
العالم كان مدووش بليبيا وبلدنا كانت تستنى فى طرف الجسر وعمى عليش فاجئهم وطلع من تحت الكوم
والناس كان نفسهم يشاوروا عليه وهوه راكبه عربيه بيجو 504 ويقولو بعلةو الصوت وهما بيجروا ورا البيجوا ياعينى عليك يالييبى وانشاله مايكنش جايب معاه ف الاشوله المرصوصه فوق بعض غير راديو اول مره الناس تشوفه وما يعرفوش انه بيشتغل على الكهربا لانهم مايعرفوش اساسا الكهربا وكشاف كان لما يحبو يطفوه يحطوه فى الزير والعم عليش لما فاجئهم طلعلهم من تحت الكوم بشوال منفوخ وملان ماحدش كان يعرف ايه فيه الناس اتلمت والكل يحب فى عمى عليش وده يعزم وده يتقطع واللى كان عنده وزه دبحها لعم عليش واللى كان عنده جوز ارانب بعته لعم عليش وعم عليش مافتحش الشوال لسه والناس عريانه على الاخر الواد ابن ام محمدين بتاع المطارح كان نفسه فى فلينه هلنك وزينب ام محمدين محتاجه لجلبيه قذافى وكل اللى كان عايل همه العم عليش السكر اللى بنحلى به الشاى هانحطه فى ايه لقالهم اختراع جديد اسمه حقق فاضيه لمها من ليبيا وجابها كل واحد يحافظ على حقه اختراع جديد بدل القرطايس والسر فى المندايل المحلاوى عم عليش شبع قتل ونكت م الناس لكن فى اخر المتمه كل واحد فرح بحق السكر بتاعه وشوية سهارى عن بنى غازى
Welcome To My Page
I would like to welcome you to my web site. Please feel free to browse the site and email me any comments you may have.
